Цукру -- як ніколі...

Звычайны камбінат заканчвае перапрацоўку сыравіны на пачатку студзеня, але сёлета ўраджай цукровых буракоў пераўзышоў усе прагнозы і адсунуў вытворчы графік. Цяпер прафілактычны рамонт прыйдзецца пачаць на месяц пазней, затое да канца студзеня ёсць магчымасць “нафугаваць” яшчэ 10 тыс. тон цукру.

Па словах старшыні назіральнага савета ТАА “Слуцкі  цукроварафінадны камбінат” Восіпа Дапіры, калектыў прадпрыемства мог  бы ўкласціся ў запланаваныя тэрміны  перапрацоўкі сыравіны, але “перашкодзіў”  не толькі рэкордны ўраджай, але і... цёплая зіма. Узніклі праблемы з захаваннем буракоў, яны пачалі падгніваць. І гэта крайне ўскладніла тэхналагічны працэс: прыходзіцца часцей мяняць фільтры і палотны на ўчастках здрабнення і фільтрацыі. Як бы там не было, але да 1-га лютага ўся сыравіна будзе ўроблена і пойдзе на рэалізацыю – на айчынны і замежны рынак.