Парламенцкая Асамблея Савета Еўропы прыняла рэзалюцыю па Беларусі

Дэпутуты Парламенцкай Асамблеі Савета Еўропы падтрымалі распрацаваны Палітычным камітэтам варыянт рэзалюцыі па Беларусі.

Дакумент "цалкам падтрымлівае мэтавыя санкцыі ЕС, якія мусяць быць узмоцнены, і заклікае краіны Савета Еўропы далучыцца да іх, пакуль не вызваляць і не рэабілітуюць усіх палітычных зняволеных і не скончацца рэпрэсіі супраць палітычных апанентаў, прадстаўнікоў грамадзянскай супольнасці і праваабаронцаў". Апрача таго, падтрыманая і рэкамендацыя ПАСЕ да Камітэту Міністраў, кіроўнага органа Савета Еўропы, каб той выступіў з такім заклікам да ўсіх удзельнікаў арганізацыі.

Нагадаем, што ў Савет Еўропы ўваходзяць усе краіны нашага кантынента (апрача Беларусі, Ватыкана і Косава), уключна з Расіяй, Украінай ды Турцыяй.

Паводле рэзалюцыі, ПАСЕ глыбока занепакоены ўсё горшай сітуацыяй з правамі чалавека, палітычнымі і грамадзянскімі свабодамі ў Беларусі, асуджае рэпрэсіі і ціск супраць нязгодных.

Рэзалюцыя змяшчае заклік да краін ЕС захаваць санкцыі да Беларусі, "у асаблівасці ў дачыненні да дзяржаўных прадпрыемтсваў, звязаных з Аляксандрам Лукашэнкам і іншымі высокімі чыноўнікамі", і працягнуць падтрымку незалежных няўрадавых арганізацый.

Акрамя гэтага, ПАСЕ заклікае пашыраць каналы зносін з прадстаўнікамі беларускай грамадзянскай супольнасці, незалежнымі СМІ і апазіцыяй, а таксама разгледзець магчымасць зніжэння або адмены візавых збораў для грамадзян Беларусі.  А таксама пастанаўляе пакінуць кантакты на высокім узроўні з беларускімі ўладамі замарожанымі. Без змен і пазіцыя па статусу спецыяльнага запрошанага для Беларусі: ён застаецца ўвязаным да мараторыя на смяротнае пакарання і прагрэса ў сферы дэмакратыі.