У Вільні можна будзе пакаштаваць Вольскага

Легендарны, хаця ўжо і былы лідэр культавага сярод апазіцыйна настроенай моладзі гурта Н.Р.М. («Незалежная рэспубліка Мроя»), стваральнік любімага шырокімі народнымі масамі музычнага праекта «Крамбамбуля», аўтар песеннай эпапеі, складзенай з дыялогаў «застабіла»-Саўкі і Грышкі-«змагара», па якой калі-небудзь будуць вывучаць эпоху Лукашэнкі на ўроках гісторыі, фігурант таямнічага «чорнага спісу», паўзабаронены на радзіме, Лявон Вольскі дасць канцэрт у Вільні, у рэстарацыі «Марцэлькіна клець» («Marceliukės Klėtis», Tuskulenu g. 35). 

Дзе, апрача як пакаштаваць Вольскага, можна выпіць і закусіць, зрабіўшы заказ па свайму смаку з меню на беларускай мове.

Канцэрт арганізаваны асацыяцыяй «StudAlliance» пры падтрымцы Еўрапейскага гуманітарнага ўніверсітэта. Можа, ня меў рацыі Станіслаў Шушкевіч, калі бэсціў ЕГУ ледзь не за наўмысную злачынную антыбеларускасць?

Колькі каштуюць квіткі і дзе іх узяць: Кошт квітка – 10 літаў (меней за 30 тысячаў беларускіх рублёў). Квіткі можна набыць у 104 аўдыторыі навучальнага корпуса ЕГУ ці па тэлефоне +370 675 16 062 (Кірыл). Таксама ёсць магчымасць заказаць квіткі праз электронны адрас student.ehu @ gmail.com. Колькасць квіткоў абмежаваная.