Апазіцыя зноў не падзяліла пасады

Сітуацыя развіваецца па звыклых сцэнарах. З аднаго боку, каардынатар кампаніі “За справядлівыя выбары” Віктар Карнеенка заявіў, што паміж палітычнымі структурамі дасягнутая дамоўленасць аб сумеснай працы па падрыхтоўцы і правядзенні назірання за парламенцкімі выбарамі. З другога боку, есць і тыя, хто мае свой пункт погляду і свае падыходы, таму да агульных дамоўленасцяў не далучыўся.
Сярод тых, хто не разам з усімі, Віктар Карніенка назваў структуру, да кіраўніцтва якой доўгі час меў непасрэднае дачыненне, -- Рух “За свабоду”.

З таго боку адказалі.

“Рух «За Свабоду» гатовы назіраць за "выбарамі-2012" на роўных з іншымі палітычнымі суб’ектамі”, -- такім чынам намеснік старшыні арганізацыі Юрась Губарэвіч пракаментаваў заяву кампаніі “За справядлівыя выбары” наконт дамоўленасцяў аб сумесным назіранні.
Паводле Юрася Губарэвіча, падчас кампаніі назірання на прэзідэнцкіх выбарах 2010 года, якая меркавалася супольнай, структуры Руху былі збольшага адсунуты ад удзелу ў ёй.

Каб пазбегнуць памылак назірання на мінулых выбарах, Рух "За Свабоду” да пачатку сёлетняй кампаніі прапанаваў яе ўдзельнікам размеркаваць накірункі (вылучэнне ў камісіі, у назіральнікі, інфармацыйная праца, распрацоўка зменаў у заканадаўства) і стварыць каардынацыйную раду з удзелам зацікаўленых суб’ектаў, якія здольныя зрабіць рэальны ўнёсак у правядзенне кампаніі, але гэта прапанова была праігнаравана.

“Роля Партыі “Справядлівы свет” – а менавіта яна галоўны ініцыятар кампаніі “За справядлівыя выбары” – у выбарчай кампаніі не да канца ясная. Вядома, што былыя камуністы не настроены падтрымліваць супольную пазіцыю большасці палітычных суб’ектаў наконт абавязковага зняцця кандыдатаў перад галасаваннем. Да ўсяго пасады каардынатараў кампаніі “За справядлівыя выбары” размеркаваныя без уліку меркавання Руху “За Свабоду”, а таксама Партыі БНФ - структур, якія маюць істотны досвед назірання і вылучэння ў камісіі. Таму не выключана, што нам давядзецца працаваць аўтаномна”, – каментуе сітуацыю Юрась Губарэвіч.

Тэм не меньш Губарэвіч паабяцаў, што Рух падтрымлівае ўсё, што сказана ініцыятарамі кампаніі “За справядлівыя выбары”, і спадзяецца, што на далейшых этапах працы атрымаецца знайсці агульную мову і скаардынаваць дзейнасць.
Адным словам, апазіцыя зноў і не разам, і не паасобку.