Ланская на «Еўрабачанні»: трагедыя ці заканамернасць?

Як вядома, у фінал нацыянальнага адбору прабілася пяць удзельнікаў — выканаўцы Юзары, Вікторыя Алешка, Гюнеш, Алена Ланская і гурт Litesound. Але за запаветнай хрустальнай птушкай — сімвала перамогі ў “ЕўраФэсце” — накіравалася Алена Ланская.

Самая маладая заслужаная артыстка Беларусі, пераможца “Славянскага базару”, успрыняла сваю перамогу спакойна, паправіла блакітную сукенку і спела на развітанне песню-канкурсантку All my life.

Магчыма, Алена натрэніравала нервы падчас скандалу, які ўспыхнуў пасля таго, як “Народная Воля” апублікавала лісты, якія сведчылі аб тым, што праз адміністрацыйны рэсурс слухачоў і гледачоў просяць падтрымаць спадарыню Ланскую.

“Я абсалютна спакойна стаўлюся да таго, што пішуць, — каментуе рэакцыю на сваю перамогу Алена Ланская. — Калі чалавек робіцца знакамітым і папулярным, у любым выпадку ў яго знаходзяцца як прыхільнікі, так і сапернікі. Таму не жадаю мусіраваць тое, што не даказана, і тое, што нехта падрабіў ці прыдумаў. Хачу яшчэ сказаць, што да канца не было вядома, хто пераможа, бо ў тым жа інтэрнэце ўвесь час то я была на першым месцы, то Гюнеш, то Litesound. І тут ужо ўсё залежала ад тэлегледачоў і прыхільнікаў”.

Адным з першых спадарыню Ланскую павіншаваў Філіп Кіркораў, які на фінальным канцэрце праспяваў дзве песні і паразважаў аб тым, колькі добрага звязвае яго з беларускімі канкурсантамі. А вось калегі па цэху не спяшаліся радаваць Алену добрымі словамі. Пакуль вядучыя ўшаноўвалі дзяўчыну з птушкай, удзельнікі Litesound пад выклікаючыя зайздрасць апладысменты прыхільнікаў білі посуд у грынруме, а Гюнеш увогуле накіравалася дадому і на сцэну не выйшла. Слухаўку яна таксама не здымае, відавочна, хоча адпачыць ад тлуму і эмоцый. Дэмарш Гюнеш, з аднаго боку, зразумелы — яе лічылі фаварыткай конкурсу, пераможцы “Еўрабачання-2011” Эл і Нікі са сцэны прасілі галасаваць за яе. Пры гэтым за дзень да фіналу ў тэлесустрэчы з усімі фіналістамі “ЕўраФэсту” Гюнеш ні слова не сказала аб магчымай фальсіфікацыі вынікаў...

Ці заслугоўвае Ланская месца на “Еўрабачанні”? Магчыма, заслугоўвае, але брудныя факты, якія выкрыліся да фіналу, абнуляюць талент і стараннасць. Спявачцы самой прыйдзецца адказваць на пытанне, ці варта была гульня свеч. Еўропа выкажа свой погляд у паўфінале “Еўрабачання” 24 мая.

Што тычыцца нечаканай славы, то Ланская магла дасягнуць яе і іншымі сродкамі. Народ ужо абмяркоўвае новыя скандалы: вунь журналіст “Комсомолки” абразіў “твар Беларусі” Ірыну Дарафееву! Куды там простай магілёўскай дзяўчыне Лене Ляпохінай...

З вынікамі галасавання будуць разбірацца

Насуперак усім чуткам, якія сцвярджалі, што Аляксандр Лукашэнка — вялікі прыхільнік творчасці Алены Ланской, ён аддаў загад разабрацца ў выніках галасавання падчас фіналу нацыянальнага адборачнага тура “ЕўраФэсту”. Спецыяльная камісія павінна высветліць, ці адпавядаюць агучаныя лічбы галасавання рэчаіснасці.

Магчыма, будуць выкрыты такія ж прыкрыя факты, як і гісторыя з сімвалам перамогі на “ЕўраФэсце” — крыштальнай птушкай ад Swarovski. Заснавальнік конкурсу Аляксандр Ціхановіч сцвярджаў, што блакітную птушачку рабілі пад заказ за 3 тысячы еўра. Як высветлілася, набыць “эксклюзіў”, вельмі падобны на гэты, можна праз інтэрнэт прыкладна за 750 долараў. Рэдкасць аказалася серыйнай мадэллю 2009 года выпуску...