Беларусь назвалі «эканамічна абсалютна несвабоднай»

"Абсалютна несвабоднымі" названы краіны, якія набралі ў рэйтынгу менш за 50 пунктаў, "пераважна несвабоднымі" лічацца краіны, якія атрымалі ад 50 да 60 пунктаў, 60—70 пунктаў набралі "адносна свабодныя", 70—80 — "у асноўным свабодныя", а звыш за 80 — "свабодныя".

Індэкс эканамічнай свабоды Беларусі склаў 48,7 пункта. Паказчыкі свабоды ад карупцыі пагоршыліся да 20,0 пункта, грашова-крэдытнай свабоды — да 62,6 пункта. Пры гэтым сярэднія паказчыкі ўсіх краін рэйтынгу ў гэтых сферах складаюць 40,5 і 70,6 пункта адпаведна.

"The Heritage Foundation" адзначае паўсюдны кантроль і ўмяшанне дзяржавы ў беларускую эканоміку. Распачатыя рэформы крыху палепшылі паказчыкі краіны ў параўнанні з мінулым годам, аднак яны застаюцца значна ніжэйшымі, чым у сярэднім па рэйтынгу, адзначаюць аўтары спісу. Дзяржава цалкам ці часткова кантралюе большасць фінансавых інстытутаў. Акрамя неабароненых правоў уласнасці і карупцыі, замежным інвестыцыям перашкаджаюць абмежаванні і бюракратыя.

Сярод 43 краін Еўропы Беларусь апынулася на 42-м месцы, абагнаўшы толькі Украіну, якая заняла 162-е месца. Расія стаіць на 143-й пазіцыі рэйтынгу, Літва — на 29-й, Польшча — на 71-й. Паўночная Карэя, якая набрала толькі 1 пункт, знаходзіцца на 179-м месцы, замыкаючы спіс.

Дзесятка самых эканамічна свабодных краін:

1. Ганконг (89,7)

2. Сінгапур (86,1)

3. Аўстралія (82,60)

4. Новая Зеландыя (82,1)

5. Ірландыя (81,3)

6. Швейцарыя (81,1)

7. Канада (80,4)

8. ЗША (78,0)

9. Данія (77,9)

10. Чылі (77,2)

Рэйтынг "The Heritage Foundation" штогод ацэньвае эканамічную свабоду ў розных краінах свету па дзесяці паказчыках, уключаючы свабоду вядзення бізнесу, гандлю, сітуацыю з фіскальнай і грашова-крэдытнай палітыкай, свабоду інвестыцый, працоўнага рынку, а таксама карупцыю.