Iна КУЛЕЙ: «Праграма Каліноўскага будзе працягвацца...»

— Сярод выпускнікоў 5 дзяўчат і 3 хлопцы, — распавядае суразмоўца. — Наколькі мне вядома, усе прыехалі дадому, акрамя Венедыкта Кляузэ і Яўгена Гавіна. Апошні вучыцца ў аспірантуры, а Кляузэ застаўся там таму, што неўязны ў Беларусь.

— А што за гісторыя з Яўгенам Скрабутанам, які ў Беларусі зараз не можа працаўладкавацца?

— Яўген сам з Гродна, па маёй інфармацыі, пасля заканчэння навучання ў Варшаўскім універсітэце Польшчы ён звярнуўся ў аддзел адукацыі Гродзенскага аблвыканкама з нагоды свайго працаўладкавання. Сам Яўген — філолаг беларускай мовы і літаратуры. Яго накіравалі ў Міністэрства адукацыі для прызнання варшаўскага дыплома. Тым часам Яўген паехаў да бацькоў у Зэльву і яшчэ там звярнуўся ў аддзел адукацыі райвыканкама. Дзе напачатку сказалі, што ім на самай справе не хапае настаўнікаў, але праз два дні ўжо заявілі, што месц няма. Такім чынам хлопец зараз без працы, а пацвярджэння дыплома пакуль так і не атрымаў. Думаем, што нейкі адказ будзе да канца гэтага месяца.

— А дзе працуюць дзяўчаты?

— У прыватных установах, не ў дзяржаўных.

— Праграма Каліноўскага будзе працягвацца?

— Так. І зараз размова ідзе пра тое, што па гэтай праграме будуць вучыцца не толькі рэпрэсаваныя маладыя людзі, але і проста грамадска актыўныя, таленавітыя хлопцы і дзяўчаты.

НАША ДАВЕДКА

Праграма Каліноўскага была заснавана 30 сакавіка 2006 года ў Варшаўскім універсітэце прэм’ер-міністрам Польшчы і рэктарамі вышэйшых навучальных устаноў гэтай краіны. Першы набор у польскія ВНУ адбыўся ў ліпені 2006 года: на вучобу было прынята больш за 200 чалавек.