Прырода перамагае...

У раёне вуліцы Кузьмы Чорнага ўбачылі такую карціну: у дварах сумёты, на тэрыторыі чатырох дамоў — адзін дворнік ЖЭС-6: “Ледзь паспяваю снег з ганкаў прыбіраць,  праход для людзей толькі ў адным месцы расчысціў. Увогуле — гэта марная праца, бо снегапад працягваецца. Абяцалі крыху пазней дапамагчы тэхнікай, тады, можа, са снегам удасца справіцца”, — сказаў ён.

Як удалося высветліць, у мінскіх камунальшчыкаў ёсць прыарытэтныя “ўчасткі працы”. У першую чаргу ад снегу прыбіраюцца два галоўныя праспекты сталіцы — Незалежнасці і Пераможцаў. Па нарматывах, яны павінны быць ачышчаны ад снегу за суткі. Тратуары іншых вуліц і праспектаў могуць убірацца на працягу трох дзён.

Дарэчы, учора ў 8.30 раніцы непрыбранай заставалася тэрыторыя нават ля Адміністрацыі прэзідэнта па вуліцы Энгельса. Хаця звычайна камунальшчыкі хутка змятаюць тут ледзьве не кожную сняжынку...

У 10.00 аўтар гэтых радкоў апынуўся на “прэзідэнцкай” трасе — на праспекце Пераможцаў. Менавіта гэтай дарогай ездзіць на работу А.Лукашэнка. Варта прызнаць — праезная частка праспекта была калі і не “вылізана” ад снегу, то больш-менш ачышчана.

На “прэзідэнцкай” трасе...

...у звычайным квартале.

У 10.30 парадавалі сваёй чысцінёй і многія прыпынкі грамадскага транспарту. Напрыклад, у раёне вуліц Леніна, у раёне станцыі метро “Няміга” “пятачкі” для чакання аўтобусаў і тралейбусаў былі расчышчаны і пасыпаны пяском.

А вось у самым цэнтры горада — на вуліцы Кірава камунальшчыкі згрэблі снег на сярэдзіну асфальта, стварыўшы своеасаблівую раздзяляльную паласу для аўтатранспарту...

Самай праблемнай “кропкай” у панядзелак у Мінску заставаліся раёны прыватнага сектара, напрыклад, на вуліцы Сенніцкай, побач з праспектам Дзяржынскага. Тут, у прыватным сектары, пешаходная дарожка ледзь прагледжвалася. А вось на вуліцы Грушаўскай сітуацыя выглядала больш прыстойна, было бачна, што дворнікі тут папрацавалі лепш...

Але ўчора днём у Мінску далёка не ўсе дваровыя тэрыторыі былі прыбраны.

У 12.30 трое хлопцаў на вуліцы Бакінскай беспаспяхова спрабавалі выштурхнуць са стаянкі машыну... У гэтай сітуацыі падумалася, што разумна паступілі тыя аўтааматары, якія вырашылі не ехаць на ўласным аўто. Іх машыны было пазнаць вельмі лёгка — падобныя на снегавікоў, яны сталі на прыколе, чакаючы міласці ад прыроды...

Якія б задачы ні ставілі ўлады, відавочна адно: прырода  пакуль іх перамагае.

Фота аўтара.