Канцылярыя прэзідэнта Літвы пацвердзіла факт запрашэння Лукашэнкі на ўрачыстасці ў Вільнюс

“Такое запрашэнне было адпраўлена. Адказ мы чакаем”, — паведамілі БелаПАН у канцылярыі. Атрымаць каментарый у прэс-службе беларускага прэзідэнта не ўдалося. Калі нумар газеты здаваўся ў друк, яшчэ не было вядома, ці паедзе Аляксандр Рыгоравіч у Вільнюс.

Апошнім разам А.Лукашэнка наведваў Літву 16 верасня 2009 года, ён браў удзел у працы беларуска-літоўскага эканамічнага форуму ў Вільнюсе. Тады ж адбылася сустрэча прэзідэнтаў Беларусі і Літвы, якая доўжылася прыблізна дзве гадзіны.

Раней Грыбаўскайтэ заяўляла, што запрашэнне Лукашэнкі на святкаванне 20-годдзя аднаўлення дзяржаўнасці Літвы можа залежаць ад дзеянняў Мінска ў дачыненні да былога начальніка Вільнюскага гарнізона Уладзіміра Усхопчыка.

“Зараз мы вядзём перамовы з Беларуссю, спрабуем пачуць, якімі будуць захады ў супрацоўніцтве, што тычацца справы Усхопчыка”, — сказала 26 студзеня Грыбаўскайтэ, адказваючы на пытанне журналістаў адносна яе рашэння аб запрашэнні Лукашэнкі.

Літоўскія праваахоўныя органы падазраюць Усхопчыка ў тым, што 13 студзеня 1991 года ён даў загад страляць па безабаронных людзях. МЗС Літвы ўручыла Беларусі ноту ў сувязі з тым, што беларуская Генеральная пракуратура адмовілася дапамагчы суседняй краіне ў расследаванні справы Усхопчыка.

2 сакавіка стала вядома, што Усхопчык, які з 22 мая 2000 года па 19 лютага 2004 года з’яўляўся намеснікам міністра абароны Беларусі, быў дапытаны ў Генпракуратуры ў якасці сведкі паводле просьбы літоўскіх праваахоўных органаў. Матэрыялы допыту накіраваны ў Вільнюс.

Таццяна КАРАВЯНКОВА, БелаПАН.