Збіраецца скарб...

Серыя была задумана 15 гадоў таму. Тады зладзілася адмысловае Міжнароднае грамадскае аб’яднанне “Белкнігазбор” (першапачатковая назва — Міжнародны фонд “Беларускі кнігазбор”), якое паставіла перад сабой грандыёзную задачу — сабраць і выдаць усё лепшае, усё самае важнае ў літаратуры Беларусі, што стваралася цягам усёй тысячагадовай нашай гісторыі.

За час нашай дзейнасці пабачылі свет важкія аднатомнікі выбраных твораў як вядомых, так і малавядомых, а то і зусім незаслужана забытых беларускіх пісьменнікаў. Упершыню ў найбольш поўным выглядзе была выдадзена творчая спадчына Яна Чачота, Вацлава Ластоўскага, Яна Баршчэўскага, Ларысы Геніюш, Наталлі Арсенневай. Сапраўдным адкрыццём для чытача было выданне літаратурнай спадчыны Францішкі Уршулі Радзівіл, Ігната Дамейкі, Гаўрылы Гарэцкага, Часлава Пяткевіча, Аляксандра Ельскага, Зарыяна Далэнгі-Хадакоўскага, Францішка Аляхновіча. З вялікай прыхільнасцю сустрэла чытацкая грамадскасць зборнікі “Беларускія летапісы і хронікі”, “Старажытная беларуская літаратура” (ХІІ—XVII стст.), “Філаматы і філарэты”, “Расстраляная літаратура”, “Беларускія Александрыя, Троя, Трышчан...”.

У цяперашні час ідзе напружаная праца над падрыхтоўкай новых тамоў нашай залатой серыі. Беларускага чытача чакаюць радасныя сустрэчы з прадстаўнічымі аднатомнікамі Сымона Буднага, Францішка Багамольца, Юльяна Нямцэвіча, Міхала Клеафаса Агінскага, Евы Фялінскай, Паўла Шпілеўскага, Генрыка Ржавускага, Уладзіслава Сыракомлі, Вінцэнта Дуніна-Марцінкевіча, Адама Плуга, Францішка Багушэвіча, Ядвігіна Ш., Міхася Зарэцкага, Цішкі Гартнага, Уладзіслава Галубка, Уладзіміра Дудзіцкага, Алеся Салаўя, Вінцука Адважнага, Масея Сяднёва, Аляксея Пысіна і іншых.

Літаратура побач з народнай творчасцю — аснова нацыянальнай культуры. І той, хто будзе збіраць для ўласнай бібліятэкі кнігі нашай серыі, стане з часам уладальнікам самага дарагога скарбу, які будзе перадавацца ў спадчыну яго дзецям, унукам і праўнукам. “Беларускі кнігазбор” стане для іх невычэрпнай крыніцай ведаў і духоўнага ўзбагачэння, своеасаблівым універсітэтам культуры.

З самага пачатку мы запланавалі выдаць 200 тамоў “Беларускага кнігазбору”. Нядаўна з друку выйшаў 50-ы том серыі — “Выбраныя творы” класіка беларускай літаратуры Максіма Гарэцкага. Гэта для ўсіх нас вялікае свята: як-ніяк чацвёртая частка нашага плана выканана!

З гэтай нагоды мы ладзім юбілейную вечарыну пад назвай “ЗБІРАЎСЯ СКАРБ: 50 ТАМОЎ “БЕЛАРУСКАГА КНІГАЗБОРУ”. Вечарына адбудзецца 17 сакавіка ў 18 гадзін у Палацы мастацтва (вул.Казлова, 3). Уваход вольны. У вечарыне прымуць удзел вядомыя пісьменнікі, дзеячы культуры, а ў музычнай частцы — трыо “Вытокі”, Лявон Вольскі, Таццяна Беланогая і іншыя.

Кастусь ЦВІРКА, старшыня МГА “Белкнігазбор”, пісьменнік.