Замак з крапівы Зміцера Вішнёва

Сюжет рамана апісаць даволі складана. Падарожжы лірычнага героя-мастака ў Берлін, роздумы, уражанні, размовы з карлікамі і парады звар’яцелай бабулькі. Хіба гэтыя словы ў агульных рысах могуць апісаць аўтарскую задуму?

“Замак пабудаваны з крапівы” падзелены на 13 частак. Кожная як кавалак пазла — складваецца ў адзіны малюнак толькі пры пэўных намаганнях чытача.

“Я лічу, што лепшыя творы пішуцца выключна для сябе, — сцвярджаў у размове Зміцер Вішнёў. — Калі я паставіў тлустую кропку напрыканцы рамана, я доўга раздумваў, варта яго выносіць на аўдыторыю ці не. У выніку прыйшоў да высновы, што трэба гэты літаратурны карабель выпраўляць у вандроўку да чалавечых масаў. Прынамсі, аўтару будзе не сорамна. Хаця, я не выключаю, што праз некалькі гадоў я захачу  перапрацаваць пэўныя раздзелы з “Замка”.

Набыць кнігу, пазнаёміцца з раманам аўтара і паслухаць крытычныя выступы апанентаў можна неўзабаве на прэзентацыі. Імпрэза адбудзецца 16 сакавіка ў 18 гадзін у Дзяржаўным музеі гісторыі беларускай літаратуры. У мерапрыемстве возьмуць удзел Альгерд Бахарэвіч, Адам Глобус, Зміцер Плян, Пятро Васючэнка і іншыя. Будзе і музычнае забеспячэнне ад гурта “SARASWATI”. Уваход вольны.