Ці выкананы 12 умоў Еўрасаюза?

Тады, тры з лішнім гады таму, еўрачыноўнікі заяўлялі, што толькі пры ўмове выканання гэтых патрабаванняў Беларусь атрымае міжнародную дапамогу. У тым ліку і фінансавую.

І што мы маем зараз? Беларусь спраўна атрымлівае еўрапейскія крэдыты, хаця і невялікія. Еўропа скарэкціравала сваю палітыку ў дачыненні да Беларусі: ад палітыкі ізаляцыі Еўрасаюз перайшоў да палітыкі дыялогу. Вышэйшае кіраўніцтва нашай краіны нібыта абвясціла курс на лібералізацыю. Праўда, калі зыходзіць з выканання ўмоў Еўропы, то яго можна смела лічыць умоўным.

Сёння "Народная Воля" вырашыла вярнуцца да 12 умоў, якія былі абавязковымі для паляпшэння сітуацыі ў Беларусі.

У прыведзенай ніжэй табліцы мы адказваем на пытанне, якія з еўрапейскіх патрабаванняў былі выкананы беларускімі ўладамі.

Як бачым, ніводная з прапаноў, з якой выступіў Еўрапейскі Саюз, беларускімі ўладамі не выканана. Пры гэтым Аляксандр Лукашэнка і яго бліжэйшыя паплечнікі ахвотна выпрошваюць і бяруць тыя ж еўрапейскія крэдыты, але нічога для рэальнага паляпшэння жыццёва-прававога клімату не робяць.

Для таго каб нас не звінавацілі ў перадузятасці і галаслоўнасці, мы прывядзём толькі некалькі прыкладаў таго, што НІВОДНАЯ з вышэйзгаданых умоў не выканана.

Што тычыцца правоў беларусаў на выбар лідэраў дэмакратычным шляхам — права чуць усе меркаванні і бачыць усіх кандыдатаў на выбарах, права апазіцыйных кандыдатаў і груп падтрымкі праводзіць кампаніі без ціску, судовага пераследу, права на незалежнае назіранне за выбарамі беларускімі няўрадавымі арганізацыямі, права волевыяўлення і права на справядлівы падлік галасоў, то тут і тлумачыць асабліва няма чаго. Бо ні адзін з апанентаў Аляксандра Лукашэнкі ні на дзяржаўным тэлебачанні, ні на старонках дзяржаўных газет не з'явіўся (за выключэннем "выкрывальных" тэлерэпартажаў аб дзейнасці апазіцыі ў эфіры беларускіх тэлеканалаў). Дагэтуль беларуская апазіцыя пры роўнасці правоў і свабод грамадзян, якія гарантуюцца Канстытуцыяй, не мае доступу да дзяржаўных СМІ.

Пра павагу ўлад да права беларусаў на атрыманне незалежнай інфармацыі і свабоду слова яскрава сведчаць апошнія падзеі — вобыскі ў "Народнай Волі" і офісе "Хартыі-97".

Пра павагу правоў няўрадавых арганізацый у Беларусі таксама гаварыць не прыходзіцца. Яскравыя прыклады — безвыніковыя спробы рэгістрацыі праваабарончага цэнтра "Вясна", маладзёжнай палітычнай арганізацыі "Малады фронт" і партыі "Беларуская хрысціянская дэмакратыя". Адзіным суб'ектам, які быў зарэгістраваны ў Мінюсце за апошні час, стаў рух "За Свабоду".

Тое самае тычыцца палітычных вязняў. За кратамі застаецца Арцём Дубскі. Зараз у Вярхоўным судзе разглядаецца справа ваўкавыскіх прадпрымальнікаў Мікалая Аўтуховіча і Уладзіміра Асіпенкі... Справы па знікненні палітыкаў Віктара Ганчара, Юрыя Захаранкі, бізнесоўца Анатоля Красоўскага і журналіста Зміцера Завадскага дагэтуль цалкам не расследаваны.

У Беларусі па-ранейшаму прыцясняюцца правы нацыянальных меншасцяў. Апошні прыклад — інцыдэнт вакол Саюза палякаў...

Увогуле, па кожным з 12 "еўрапейскіх" пунктаў можна прыводзіць безліч прыкладаў таго, што ўмовы не выкананы.

Аднак, нягледзячы на гэта, Еўропа працягвае палітыку дыялогу з Беларуссю. Хаця ўсё часцей гучаць галасы, што гэта тупіковы шлях. Бо для дыялогу патрэбны два бакі. Афіцыйны Мінск пакуль стаіць на сваім…