Слова — не верабей...

“У першую чаргу хачу звярнуцца да галоўнага трэнера нацыянальнай зборнай Бернда Штанге, — выказаўся Алег Качан на справаздачна-выбарнай канферэнцыі Асацыяцыі “Беларуская федэрацыя футбола”. — У наступным адборачным цыкле наша каманда павінна заняць 1—2-е месца і прабіцца на чэмпіянат Еўропы. Я таксама чакаю паляпшэння вынікаў ад маладзёжнай, юнацкай і жаночай зборных. А то ў нас атрымліваецца, як у хакеі: цотны год праводзім у першым дывізіёне, а няцотны — у другім”.

Варта адзначыць, што першым прагаварыўся пра “напалеонаўскія планы” на кваліфікацыю чэмпіянату Еўропы сам Бернд Штанге, заявіўшы аб такіх жа задачах — 1-е ці 2-е месца ў групе. І тут, як кажуць, за язык ніхто не цягнуў.

Дарэчы, у маі стартуе чэмпіянат свету па хакеі, і напярэдадні галоўны трэнер алімпійскай зборнай Беларусі Міхаіл Захараў таксама выказаўся, што прывязе медалі з сусветнага першынства, калі яго пакінуць на пасадзе. Праўда, у Ванкуверы каманда не здолела ўвайсці нават у васьмёрку мацнейшых, хоць гэта было задачай-мінімум, так што не вельмі цяжка вызначыць цану словам і абяцанням многіх аўтарытэтаў ад спорту.

Адным словам, за высокія памкненні можна пахваліць, але, як кажуць: “Не кажы “гоп”, пакуль не пераскочыш!”