За вуліцу Быкава — больш за 50 тысяч мінчан

Многія мінчане станоўча паставіліся да гэтай задумы. Свае подпісы пад заявай паставіла каля 52 тысяч чалавек. Але для двухмільённага горада ці не кропля ў моры?

“Я думаю гэтых подпісаў дастаткова, — кажа эксперт кампаніі “Гавары праўду!” Аляксандр Фядута. — Мы не ведаем дакладна колькасць тых ветэранаў, якія прасілі прэзідэнта Лукашэнку перайменаваць праспект Скарыны і праспект Машэрава. Думаю, іх было не больш”.

Спадар Фядута не выключае, што з’яўленне ў Мінску вуліцы Быкава толькі пачатак. Наступным крокам павінен стаць помнік народнаму пісьменніку.

“Я лічу, што помнік Быкаву неабходны, але тут трэба збіраць не подпісы, а грошы, — падзяліўся з “Народнай Воляй” эксперт. — На помнік Пушкіну ў Маскве збіралі грошы... Нават помнік Міхаілу Мураўёву Віленскаму, якога сёння ўжо няма ў Вільні, такама будавалі за сабраныя грошы.

Мы пачнём з таго, што пераймянуем вуліцу, а другім крокам можа быць збор грошай на помнік”.

Таксама спадар Фядута адзначыў, што пакуль у Мінску няма ні вуліцы, ні помніка знакамітаму пісьменніку, няблага было б хаця б усталяваць мемарыяльныя дошкі там, дзе ён жыў.

Заўважым, што збор подпісаў яшчэ працягваецца, пасля чаго дакументы будуць перададзены ў Мінгарвыканкам.