Каровы-рэкардсменкі

Прапанаваць свае дасягненні прыехалі лепшыя гаспадаркі краіны, у тым ліку і прадстаўнікі ДУСП “Племзавод “Мухавец”. Галоўны гонар прапрыемства — яго каровы, якія здзіўляюць працаўнікоў сельскай гаспадаркі сваімі надоямі. У якасці прадстаўніцы Брэсцкай воблаці пад Мінск прыехала карова Лясная, якая дае каля 12 тысяч кілаграмаў малака ў год!

“Ніякіх сакрэтаў у нашых кароў няма, — распавяла “Народнай Волі” ветэрынарны ўрач “Мухаўца” Наталля Канцэвіч. — Зараз яны выпасваюцца на лузе, кожная атрымлівае спецыльныя камбікормы строга з улікам патрэб і колькасці ўдою”.

Лясная — карова чорна-пярэстай пароды — толькі адна са шматлікага статка племзавода “Мухавец”. Кожная карова на прадпрыемстве замацавана за пэўнай даяркай, якая сочыць за станам жывёлы, даглядае яе. Для дойкі выкарыстоўваецца тэхніка машыннага даення.

Як паведаміла “Народнай Волі” ветэрынарны ўрач прадпрыемства, хоць надоі Лясной некаторыя і называюць сенсацыйнымі, але гэта не самая лепшая карова ў “Мухаўцы”. Каля 60 галоў у статку гападаркі маюць сярэднегадавы ўдой у памеры 11—12 тысяч кілаграмаў. У шасці кароў “Мухаўца” сярэднегадавы паказчык складае 13—14 тысяч кілаграмаў малака ў год. Самы вялікі гонар прадпрыемства — гэта каровы Стужачка, Незнаёмка і Кропелька. Гэта насамрэч цуд-каровы, бо іх прадукцыйнасць — звыш за 14 тысяч кілаграмаў.

“Мы прывезлі з сабою Лясную не толькі таму, што яна мае даволі высокія надоі, — патлумачыла “Народнай Волі” “гаспадыня” Лясной. — У рэшце рэшт, наша гаспадарка мае тры лепшыя каровы краіны. Жывёлы цяжка пераносяць дарогу, усё ж такі ехаць нам з Брэсцкай вобласці, і рызыкаваць самымі лепшымі мы не можам. А Лясная нармальна пераносіць транспарціроўку, таму яна і прыехала на “Белагра”.

Нягледзячы на трыццаціградусную спёку, Лясная была вельмі спакойнай, і нават складвалася ўражанне, што карова пазіруе перад фотакамерай.

Дарэчы, выстава “Белагра-2010” сабрала на полі каля Слуцкай трасы самых разнастайных прадстаўнікоў жывёлагадоўлі. Людзі ехалі з горада, каб паглядзець на жывых цэсарак, агромністых біцюгоў, быкоў, пагладзіць козлікаў і пакарміць сапраўдных экзатычных страусаў...

Фота аўтара.