Грошы даюць!

Але ж многія ігракі са стажам памятаюць, як падчас чэмпіянату Еўропы 2008 года адзін беларускі аматар футбола паставіў 50 цэнтаў на вынікі 14 матчаў. Каэфіцыент складаў 209856,0, і менавіта ў столькі разоў былі памножаны яго паўдолара, бо ўсе 14 матчаў шчасліўчык угадаў. Сума выйгрышу склала 104 тысячы 928 долараў! Можна сказаць, што чалавеку проста пашэнціла, бо тады лік 3:3 у матчы Фінляндыя—Германія альбо 3:2 на карысць Даніі ў матчы з партугальцамі не маглі прадказаць нават спартыўныя аналітыкі. Лёгка ўявіць, колькі б ён зарабіў, калі б паставіў хоць 10 долараў, — аж 2 мільёны 98 тысяч "зялёных"!

Вось і зараз многія вырашылі змагацца з крызісам самастойна, абапіраючыся толькі на свае веды ў футболе і сумленнасць каманд-удзельніц сусветнага першынства.

Як правіла, чэргі каля букмекерскіх кантор пачынаюць расці ўжо з самага іх адкрыцця. У іх, як правіла, не пачуеш пра палітыку, рост цэн і беларуска-расійскія адносіны. Гэтым людзям куды больш значнымі падзеямі падаюцца нічыя англічан з амерыканцамі альбо перамога немцаў над аўстралійцамі з буйным лікам.

— А каб яна правалілася, гэтая Паўночная Карэя! — мацюкаецца балельшчык, успамінаючы матч зборнай КНДР з камандай Бразіліі (1:2). — За пару хвілін да заканчэння гульні карэйцы забілі, а я ж паставіў, што ў матчы будзе не больш за два галы. Мільён рублёў — як карова языком злізала.

— Лапух ты, — ласкава прасвятляе нешчасліўца сусед па чарзе. — Першыя матчы заўсёды напружаныя, таму зборныя і не раскрываюцца. Тут інтуіцыя патрэбна. Не хвалюйся, да канца чэмпіянату яшчэ зможаш і "адбіць" страчаныя грошы, і зарабіць да заробленага.

— Трэба, трэба "адбіваць", — супакоўвае сябе небарака і працягвае ў букмекерскае акенца яшчэ паўтара мільёна.

…Азарт — ён у крыві. Як у той прымаўцы: "Не за тое пабіў бацька сына, што той грошы ў карты прайграў, а за тое, што вырашыў адыграцца". Зрэшты, азартныя людзі былі заўсёды. Хтосьці выйграе, хтосьці прайграе… Жонка майго добрага знаёмага — аматара букмекерскіх ставак з гэтай нагоды кажа пра свайго мужа так: "Затое не прапівае…"