I мільён долараў не ўратуе ад турмы

«Хлопцы» на мільён долараў

У судзе Фрунзенскага раёна сталіцы аб’яўлены часовы перапынак у справе “на мільён долараў”.

Як паведамілі “Народнай Волі” ў прэс-службе Міністэрства ўнутраных спраў, зараз удзельнікі справы чакаюць вынясення прысуду, які будзе абвешчаны ў ліпені.

Крымінальная справа, у якой фігуруе хабар на суму каля 913 тысяч долараў, стала проста сенсацыйнай для Беларусі. Размова ідзе аб злачыннай групоўцы, якую ўзначальваў былы намеснік старшыні Бабруйскага гарвыканкама Сяргей Валяваты. Фігурантамі па справе праходзяць чыноўнікі з Магілёўскай вобласці і Мінгарвыканкама. Усяго на лаве падсудных 16 чалавек.

Яшчэ ў 2008 годзе супраць Сяргея Валяватага былі ўзбуджаны адразу 10 (!) крымінальных спраў. Галоўнае абвінавачанне — стварэнне злачыннай арганізацыі, якая займалася крадзяжом сродкаў Бабруйскага камбіната жалезабетонных вырабаў, махлярствам, атрыманнем і дачай хабару пры размеркаванні жылля ў Мінску.

Чыноўнікі ўдзельнічалі ў будоўлі дамоў у Мінску. Кватэры афіцыйна прадаваліся па адных коштах, а рэальна — пакупнікі даплачвалі грошы непасрэдна фігурантам справы.

У межах гэтага ж расследавання Генпракуратура ўзбудзіла яшчэ адну крымінальную справу супраць дырэктара Таварыства з абмежаванай адказнасцю “Заходняя нерухомасць”. Згодна з меркаваннямі следчых, кіраўнік фірмы з красавіка па май 2008 года незаконна аказваў рыэлтарскія паслугі. Вядомы нават даход за гэтую дзейнасць — 22,4 тысячы долараў.

Шоу скончана?

У хуткім часе суд паставіць кропку і ў справе прадзюсера Генадзя Шульмана.

Былы дырэктар канцэртнага агенцтва “Класс-Клуб ДК” напазычаў за некалькі гадоў амаль 641 мільён раблёў. У якасці пацярпелых у судовай зале знаходзяцца былыя калегі Шульмана, якія разам з ім займаліся арганізацыяй канцэртаў. Крэдыторы перасталі верыць у тое, што Шульман верне ім грошы, але былы прадзюсер нават на лаве падсудных кажа, што грошы ён хацеў вярнуць.

Першапачаткова Шульмана абвінавачвалі па трох артыкулах Крымінальнага кодэкса Беларусі: злосным хуліганстве, махлярстве ў асоба буйным памеры і прычыненні маёмаснай шкоды ў буйным памеры без прыкмет крадзяжу. Пазней суд дадаў да справы яшчэ адзін артыкул - махлярства, здзейсненае арганізаванай групай ці ў асоба буйным памеры.

Калі будзе вынесены прысуд, пакуль не вядома, бо ў судовых пасяджэннях аб’яўлены перапынак.

Як паведамілі “Народнай Волі” ў судзе Савецкага раёна Мінска, пакуль не вядома, калі слуханні будуць працягнуты. Справа знаходзіцца на дадатковым расследаванні.