У Беларусі створана першая жаночая хакейная каманда

Паводле паведамлення прэс-службы Федэрацыі хакея, 27 мая каманда была зарэгістравана як юрыдычная асоба — ТАА "Жаночы хакейны клуб" і ў хуткім часе ўвайшла ў склад членаў ФХРБ. Асноўная задача каманды — папулярызацыя жаночага хакея на тэрыторыі краіны і стварэнне базы для фарміравання  нацыянальнай зборнай. Генеральным дырэктарам клуба стаў Барыс Тартуноў, а галоўным трэнерам — Васіль Панкоў. Першы збор каманды адбудзецца 1 жніўня ў Раўбічах, дзе дзяўчаты і будуць гуляць на працягу сезона. Беларускі заявіліся ў адкрыты чэмпіянат Латвіі, дзе выступяць таксама чатыры каманды краіны-гаспадыні і тры каманды з Эстоніі.

Першыя юныя хакеісткі ў Беларусі пачалі з'яўляцца некалькі гадоў таму. "Гэтым заўзятым і таленавітым дзяўчынкам вельмі хацелася гуляць у хакей, хаця гэта і было спалучана для іх і іх бацькоў з цэлым шэрагам цяжкасцяў", — адзначаецца ў паведамленні.

Цяпер жаночы хакей афіцыйна ўключаны ў праграму развіцця хакея на 2010—2014 гады.

Прадугледжваецца, у прыватнасці, стварэнне аддзяленняў жаночага хакея ў існуючых спецыялізаваных хакейных ДЮСШ.