У Беларусі знайшлі прыкметы тропікаў

Прычым, заўважыў ён, у апошнія гады рост колькасці ападкаў назіраецца ў Беларусі летам: стаіць цёплае, але вільготнае надвор’е. “Не толькі сёлета, але і ў мінулым годзе быў дажджлівы чэрвень, калі выпадала ў некаторых раёнах больш за месячную норму ападкаў”, — сказаў Рабаў. Цёплае і вільготнае надвор’е летам сведчыць аб праяўленні ў краіне прыкмет трапічнага клімату.

У сваю чаргу дырэктар дэпартамента па гідраметэаралогіі Міністэрства прыродных рэсурсаў і аховы навакольнага асяроддзя Марыя Гермянчук паведаміла, што ў найбліжэйшыя 50 гадоў у Беларусі чакаецца павелічэнне колькасці ападкаў. Хоць у заходняй частцы краіны, Гродзенскай і Брэсцкай абласцях, паводле некаторых разлікаў, колькасць ападкаў, наадварот, можа паменшыцца.

Паводле слоў Гермянчук, тэндэнцыя да павелічэння колькасці ападкаў характэрная для сярэдніх шырот усяго паўночнага паўшар’я. У Еўропе гэта — Беларусь, частка Польшчы, Германія, краіны Балтыі, заходняя частка еўрапейскага рэгіёна Расіі. У той жа час у краінах Міжземнамор’я, паўднёвай частцы Еўропы і рэгіёна Паўночнай Сахары адзначаецца тэндэнцыя да памяншэння колькасці ападкаў, што вядзе да росту колькасці засух.

Спецыялісты тлумачаць такія тэндэнцыі асаблівасцю змянення цыркуляцыі атмасферы, а не выкідамі парніковых газаў, як лічаць многія. “Тут можна ўспомніць і пра Гальфстрым, і пра раставанне палярных ільдоў, але наўпрост рабіць высновы нельга: гэта вельмі шматфактарная сістэма, якая слаба мадэлюецца і слаба прагназуецца”, — сказала Гермянчук.

 

Анастасія Янушэўская,

БелаПАН.