Справа педафілаў

Асуджаныя таксама павінны кампенсаваць маральны ўрон пацярпелым — па 10 млн рублёў кожнаму дзіцяці. У лік кампенсавання ўрону пойдуць канфіскаваныя ў асуджаных рэчы: тры відэакамеры, фотаапарат, мабільныя тэлефоны і камп’ютэр.

У дачыненні да двух абвінавачаных было распачата 18 крымінальных спраў. У прыватнасці, супраць ізраільцяніна было распачата пяць крымінальных спраў па фактах учынення гвалтоўных дзеянняў сексуальнага характару ў дачыненні да заведама малалетніх і непаўналетніх, а таксама шэраг спраў па фактах вырабу матэрыялаў парнаграфічнага характару. 47-гадовы мужчына здымаў малалетніх хлопчыкаў у аголеным выглядзе.

У дачыненні да другога фігуранта, 27-гадовага гамяльчаніна, былі распачаты крымінальныя справы па двух эпізодах згвалтаванняў і трох фактах вырабу парнаграфіі.

Пацярпелымі па справе прызнаны пяць малалетніх хлопчыкаў і адзін непаўналетні.

Паводле звестак следства, падазроныя знаёміліся з хлопчыкамі на вуліцы, прапаноўвалі пачастунак, у тым ліку спіртныя напоі, прыводзілі ў сваю кватэру. У якасці ўзнагароды дзецям дазвалялі гуляць у камп’ютэрныя гульні, вадзілі ў парк, на пляж, на забаўляльныя мерапрыемствы.

Усе шасцёра дзяцей ведаюць адзін аднаго, жывуць у адным раёне, паходзяць з сем’яў з нізкім дастаткам. Пасля раскрыцця злачынстваў хлопчыкі пры падтрымцы Беларускага таварыства Чырвонага Крыжа праходзілі псіхалагічную рэабілітацыю. Грамадская арганізацыя таксама аплаціла пацярпелым паслугі адваката.

Каментуючы журналістам прыгавор, маці аднаго з пацярпелых заявіла: “За такое злачынства, за тое, колькі мы перажылі за гэтыя сем месяцаў, пакуль ішоў суд, трэба строга караць. Такія дрэні наогул не павінны знаходзіцца ў грамадстве, іх трэба пажыццёва ізаляваць. Псіхічнаму здароўю нашых дзяцей прычынены сур’ёзны ўрон”.

Пры гэтым жанчына не мае намеру абскардзіць прыгавор суда, паколькі, паводле яе слоў, “рада, што гэты кашмар нарэшце скончыўся”.

Тым часам у дачыненні да асуджанага грамадзяніна Ізраіля пракуратура распачала яшчэ дзве крымінальная справы, паколькі былі ўстаноўлены яшчэ дзве ахвяры педафіла.

 Алена ГЕРМАНОВІЧ, БелаПАН.

ДАРЭЧЫ

У Польшчы прынялі закон, які дазваляе кастрацыю педафілаў. Шэраг краін ужо мае такую практыку, але ў іх хімічная кастрацыя дазваляецца толькі са згоды злачынцаў. Аднак шэраг гучных злачынстваў, якія адбыліся ў Польшчы, прымусіў урад перагледзець закон. Цяпер педафілаў будуць кастрыраваць прымусова. Ці не пераняць нам вопыт суседзяў?