Хто купіць кватэру Міхаіла Снегіра?

"Падобна на тое, што калі кватэру прададуць, нас проста выкінуць на вуліцу", — сказаў сын асуджанага пракурора "Народнай Волі".

"Пра тое, што кватэру будуць прадаваць, нам сказалі судовыя выканаўцы, — распавядае Вадзім Снягір. — Калі я ўсё правільна зразумеў, то спачатку знойдуць пакупніка, а той пасля набыцця кватэры павінен будзе звярнуцца ў суд з хадайніцтвам вызваліць жылплошчу ад іншых жыльцоў.

Не ведаю, ці знойдзецца ахвотны пакупнік, які на такіх умовах аддасць грошы за гэтую кватэру? І той жа бізнесмен Уладзімір Сідаровіч, які мае дамову аб арэндзе гэтай кватэры, можа зрабіць з новымі жыхарамі гэтаксама, як і з намі ў свой час — праз суд заявіць пра свае правы на гэтую жылплошчу. Нядаўна яго па рашэнні суда выселілі з кватэры на Грыбаедава, аднак, наколькі я ведаю, дамова аб арэндзе з ім не скасавана..."

Як паведамляла ўжо "Народная Воля", кватэру на вуліцы Грыбаедава ў Мінску Міхаіл Снягір набыў у маі 2007 года. А ў лістападзе 2008 года А.Лукашэнка заявіў, што яна была набыта па відавочна прыніжаным кошце, а асобныя суддзі Цэнтральнага раёна Мінска прынялі заказное рашэнне на карысць Снегіра. У 1999 годзе гэтую ж самую кватэру на 25 гадоў арандаваў у кампаніі "Шве-Бел" бізнесмен Уладзімір Сідаровіч. І паколькі дамова пра арэнду з ім не была скасавана, то Сідаровіч, па рашэнні суда, меў права там пражываць разам з сям'ёй. На гэтае рашэнне суда была пададзена касацыйная скарга, аднак яе разгляд прыпынілі да вынясення прысуду па крымінальнай справе Снегіра. Згодна з прысудам Вярхоўнага суда, кватэра павінна быць канфіскавана ў Снегіра. Сам Снягір асуджаны на 7 гадоў пазбаўлення волі.