Уладзімір НЯКЛЯЕЎ: «Быкаў — гонар Беларусі, і наш абавязак — ушанаваць памяць пра яго»

У Мінгарвыканкам былі перададзены 5 тысяч арыгінальных подпісаў і 100 тысяч копій тых подпісаў, якія на мінулым тыдні былі скрадзены. Нагадаем, што аналагічная акцыя праводзілася і ў Гродне.

— У Гродне ў нас сабрана каля 8 тысяч подпісаў, аднак у гарвыканкам яны не перадаваліся, — распавядае "Народнай Волі" лідэр кампаніі "Гавары праўду!" Уладзімір НЯКЛЯЕЎ. — Як вядома, на пасяджэнні тапанімічнай камісіі Гродзенскага гарадскога савета дэпутатаў было прынята рашэнне аб прысваенні адной з гарадскіх вуліц імя Васіля Быкава. Таму, калі ўсё і далей пойдзе так, як яно ёсць, то можна гарадскія ўлады і не турбаваць, вядома ж, яны звярнулі ўвагу на пазіцыю грамадскасці. Мы ж не за сваю ўласную славу змагаемся і не дзеля таго, каб проста наведацца з подпісамі ў гарвыканкам. Калі яны нарэшце назавуць, то ў нас адпадзе неабходнасць грукацца ў дзверы і кагосьці напружваць. А калі справа зацягнецца, то, безумоўна, давядзецца нагадаць.

— А калі чакаецца нейкі адказ з Мінгарвыканкама?

— Думаю, што ён будзе дадзены на працягу месяца.

— Ці вядзецца нейкае разбіральніцтва па скрадзеных подпісах?

— Мы напісалі заяву… Можа быць, злодзеі, калі кралі подпісы, падумалі, што там нейкія каштоўныя рукапісы, за якія дадуць грошы. А калі разабраліся, то проста выкінулі. Раптам і знойдзе міліцыя…