Ліквідацыя «Кераміна» — хакейнае рэфармаванне

Хаця яшчэ адразу пасля таго, як хакеісты мінскай каманды выйшлі з адпачынку, нічога не абяцала бяды ні ім, ні прыхільнікам каманды. Хакеісты і трэнеры адправіліся на першы перадсезонны збор у Раўбічы, дзе распачалі падрыхтоўку да новага сезона.

Чуткі аб тым, што хакейны "Керамін" можа спыніць сваё існаванне, папаўзлі на пачатку бягучага месяца. У балельшчыцкіх колах пагаворвалі аб тым, што генеральны спонсар каманды — аднайменнае прадпрыемства адмаўляецца фінансаваць хакейную каманду. Але гэта былі толькі плёткі. Проста ў айчынных хакейных вярхах вырашылі, што завод "Керамін" павінен спансіраваць іншы хакейны праект — мінскае "Дынама", якое ўжо два гады, мякка кажучы, не вельмі ўдала прадстаўляе Беларусь у Кантынентальнай хакейнай лізе. А хакеісты мінскага "Кераміна", па задумцы кіраўніцтва федэрацыі, павінны ўзмацніць іншыя хакейныя клубы.

Балельшчыкі, а "Керамін" і сапраўды ствараўся ў свой час, як "заводская" каманда, з такой пастановай пытання не пагадзіліся і звярнуліся з адкрытым лістом да Аляксандра Лукашэнкі. Называючы  ў сваім пасланні Лукашэнку чалавекам, "які шмат зрабіў для беларускага хакея", яны прасілі ўратаваць "Керамін" ад расфарміравання. Аляксандр Рыгоравіч ліст, можа, і прачытаў, але просьбу балельшчыкаў не задаволіў. Падобна на тое, што лёс хакейнага "Кераміна" быў перадвызначаны, і Аляксандр Рыгоравіч пра гэта ўжо ведаў…

Такім чынам, хакейны клуб "Керамін" спыніў сваё існаванне.

Вось як пракаментаваў сітуацыю старшыня Беларускай федэрацыі хакея Яўген Ворсін:

"Керамін" мае багатыя традыцыі — каманда заваёўвала Кубак Беларусі, была чэмпіёнам краіны ў 2002-м і 2008 годзе. Аднак у апошнія гады праца "Кераміна"сутыкнулася з цяжкасцямі, пачынаючы ад фарміравання фарм-клуба, наяўнасць якога была абавязковай для ўдзельнікаў чэмпіянату краіны. "Дубль" складалі хлопцы з СДЮШАР па хакеі, з якой у каманды была заключана дамова. У "Кераміна" не было ўласнай лядовай пляцоўкі — яны арандавалі Лядовы палац, а там толькі 4 раздзявальні, што недастаткова для знаходжання ў палацы большай колькасці каманд, чым адна.

Тым часам былі створаны дзве каманды — "Юнацтва" і "Мінскія зубры", якія выступяць у Маладзёжнай хакейнай лізе (вырашана, што "Юнацтва" будзе гуляць якраз у Лядовым палацы на Прытыцкага, дзе з дзесятак гадоў гаспадарыў "Керамін". — Аўт.) і з'явілася неабходнасць для ўмацавання гэтых структур.

Таксама было прынята рашэнне разгледзець магчымасць умацавання за кошт рэсурсаў клуба "Керамін", і перш за ўсё маладзёжнага складу, каманд МХЛ".

Дарэчы, фінансавыя рэсурсы прадпрыемства "Керамін" зараз будуць накіраваны ў дапамогу ХК "Дынама-Мінск". Вынікам рэфармавання стане аб'яднанне ХК "Керамін" з "Мінскімі зубрамі".

Што тычыцца хакеістаў, з якімі неіснуючы ўжо "Керамін" раней заключыў кантракты, то яны вымушаны тэрмінова працаўладкавацца. У мінулую пятніцу было вядома, што новае месца працы знайшлі 11 хакеістаў. Яшчэ каля двух дзесяткаў спартсменаў у пошуках…